Onbide

- EAE-KO EMAKUME ETA GIZONEN ARTEKO IV. BERDINTASUN PLANA

Gaiarekin loturiko esteka

EAEko Emakume eta Gizonen arteko IV. Berdintasun Planaren barruan, VIII. legegintzaldian euskal botere publikoek berdintasunaren arloan jarraitu beharreko ildoak zein diren zehazten da. Aurreko hiru planek indarrean egon diren urteetan izandako bilakaera eta aurrerapenen emaitza gisa sortu da, bestelako esparru batean, Emakumeen eta Gizonen Berdintasunerako otsailaren 18ko 4/2005 Legea onartu ondotik.

Lege testuak onartzea berdintasuna garatzeko aukera bat da, bai erakundeen bultzadaren ikuspegitik, legearen laguntzarekin indarberriturik jarraitu behar baitute lanean, eta bai pizten dituen gizarte aukeren ikuspegitik. Arrazoi horrengatik, IV. Planak aukera irekiei erantzun asmo die, oinarrizko helburu hauek lortzen lagunduko duen tresna bihurtuta:

• Legearen artikulatua bete, garatu eta ezar dadila sustatzea.
• Jauzi kualitatibo bat egitea politiken nondik norakoa gehiago zehazteko; horretarako, berdintasunaren arloan eragin iraunkor eta biderkatzailea izango duen xede sorta bat lehenetsi behar da, eta erakunde guztiek buru-belarri jardun behar dute horretan.
• Politikak ezartzeko ardura duten pertsonen jardun esparruak gehiago argitzea eta koherenteago egitea; izan ere, urteetan lan bikaina egin dute, eta haien esperientziak eta ezagutzek erronka berriei heltzeko modua ematen dute.
• Kudeaketa eta koordinazio egituren eta sistemen garapena eta eraginkortasuna areagotzea; izan ere, orain arte funtsezko funtzioa izan dute, eta gaur egun erronka garrantzitsuei buru egin behar diete.
• Agerian uztea berdintasunerako politika publikoak zer-nolako eragina izaten ari diren, abiapuntuko gizarte egoerak neurtuta eta plana indarrean dagoen aldian izan duten bilakaera aztertuta.